Loading...
हुम्ला, ७ असोज । छिमेकी भारतले नाकाबन्दी गर्ने धम्की दिइरहँदा अर्थमन्त्री डा. रामशरण महत चीनसँगको नाका खोल्ने विषयमा अध्ययन गर्न हुम्ला पुगेका छन् ।
अर्थमन्त्री डा. महतसहित १९ जनाको टोली हुम्लामा पुगेको हो । अर्थमन्त्रीको स्वागतमा जिल्ला सदरमुकाम सिमिकोटमा गरिएको कार्यक्रममा बोल्दै अर्थमन्त्री महतले चीनको नाका खोल्दा आवश्यक वस्तु आयात गर्न सजिलो हुने भएमा हिल्सा नाका खोल्नका लागि आवश्यक सहयोग गर्न सरकार तयार रहेको बताए । कर्णाली कोरीडोरका लागि आवश्यक बजेटको व्यवस्था गर्ने प्रतिवद्धता गर्दै मन्त्री महतले अर्थ मन्त्रालय र सरकारले हिल्सा सिमिकोट सडक खण्डका लागि आवश्यक बजेटको समेत व्यवस्था गर्ने बताए ।
यसैगरी नेपाल चीन सिमामा रहेको हिल्सा नाकामा नेपाल चीन जोड्ने पुल निर्माणका लागि चीन सरकारसँग पहल भैरहेको उनले बताए ।
कार्यक्रममा हुम्ला जिल्लाका सभासद् जीवनबहादुर शाहीले हिल्सा नाकामा भन्सार कार्यालय राख्न आग्रह गरे ।
नेपाली सेनाको हेलिकप्टरबाट बिहीबार बिहान सिमिकोट पुगेको अर्थमन्त्रीको टोली सदरमुकाम सिमिकोटको कार्यक्रम सकेर हेलिकप्टरबाटै नेपाल चीन सिमानामा पर्ने हिल्सा नाकामा जाने कार्यक्रम रहेको छ । त्यसपश्चात कालीकोट र डोल्पा जाने कार्यक्रम रहेको जानकारी प्राप्त भएको छ ।
Loading...
Social Buttons