Loading...
नेता, कार्यकर्ता, र संचारकर्मीसँग सहज सम्बन्ध राख्ने विप्लव एकाएक भूमिगत भएको र पार्टीलाई पनि विस्तारै भूमिगत बनाउने रणनीतिमा नेकपा माओवादी लागेको विश्वस्त स्रोत बताउँछ । माओवादी जनयुद्धलाई खुलेरै सहयोग गरेका भारतीय पत्रकार आनन्दस्वरुप वर्माले विप्लवको दलले जनयुद्ध २ गर्ने सम्भावनासहितको लेख प्रकाशित भएसँग विहीबार विप्लवको दलले बन्दको समेत आह्वान गर्नुलाई योजनाबद्ध कार्य भएको विश्लेषण गरिएको छ ।
के विप्लव भूमिगत भएकै हुन् त ?
यस विषयमा प्रश्न गर्दा विप्लव माओवादीका नेता तथा केन्द्रीय जनपरिषद प्रमुख सन्तोष बुढा मगरले भूमिगत भएको भन्ने कुरालाई सिधा रुपमा अस्वीकार नगरी ‘पार्टी नेतृत्व सार्वजनिक कार्यक्रममा नदेखिने निर्णय’ भएको बताए ।
सन्तोष बुढा मगर
यसको आशय के हो ? सार्वजनिक कार्यक्रममा नदेखिनु भनेको भूमिगत हो कि होइन ?
बुढा मगरले भने- ‘सार्वजनिक कार्यक्रम वा संचार माध्यममा जानुपरे पार्टीले निर्णय गरेर मात्र उहाँ जान पाउनुहुन्छ । अन्यथा आफूखुशी उहाँ कहीँ कतै सार्वजनिक हुनुहुने छैन ।’
गत महिना खुल्लामंचबाट केपी ओलीको समानान्तर सरकारका रुपमा सन्तोष बुढा मगर नेतृत्वको सरकार आफूसँग रहेको विप्लवले घोषणा गरेका थिए । त्यसयता उनी सार्वजनिक कार्यक्रममा कतै सहभागी भएका छैनन् । विप्लवले घोषणा गरेको जनसरकार प्रमुख सन्तोष बुढा मगरले नै विप्लव आफूखुशी कहीँकतै सार्वजनिक हुन नपाउने भनेपछि विप्लव भूमिगत भएको स्पष्ट भएको छ ।
भूमिगत भएका नेता सार्वजनिक हुन पार्टीले निर्णय गर्नुपर्ने भन्ने कुराले विप्लव भूमिगत भएको स्पष्ट पार्दछ ।
विप्लवले खुल्लामंचबाट घोषणा गरेको जनसरकार पुरानै जनसरकार हो या नयाँ गठन भएको भन्ने प्रश्नमा सन्तोष बुढा मगरले भने गत मंसिर ४ देखि ६ सम्म चितवनमा भएको सम्मेलनले मलाई जनपरिषद् प्रमुखमा निर्वाचित गरेको हो ।
‘अनि यो जनपरिषद् भनेको जनसरकार हो ?’ भन्ने प्रश्नमा उनले भने- ‘यसलाई वैकल्पिक सरकारकै रुपमा लैजाने निर्णय भएको छ । यो समयअनुसार सक्रिय हुन सक्छ ।’
आनन्दस्वरुप वर्माले जनयुद्ध २ का संकेत शीर्षकमा लेख लेख्नु, विप्लव सम्पर्कविहीन हुनु, नेपाल बन्द हुनु र सन्तोष बुढा मगरले नेपालदेशडटकमलाई यस्तो प्रतिक्रिया दिनुले विप्लव नेतृत्वको माओवादी गम्भीर योजनाको तयारीमा रहेको स्पष्ट हुन्छ ।
Loading...
Social Buttons