Loading...
काठमाडौं, साउन ३१ - आइसिसी विश्व क्रिकेट लिग च्याम्पियनसिपमा नेपालका कप्तान पारस खड्का सबैभन्दा धेरै रन बनाउने खेलाडी बनेका छन् । सोमबार नेदरल्याण्ड्ससँगको खेलमा ८४ रन बनाएका उनले जारी प्रतियोगितामा ३ सय ५२ रन बनाएका हुन् ।
नेदरल्याण्ड्ससँगको पहिलो खेलमा शनिबार खाता खोल्न नसकेका पारसले दोश्रो खेलमा ९४ बलको सामना गर्दै ८४ रन बनाएका हुन् । उनले ७ चौका र १ छक्का हाने । पारसले यो सहित गरेर जारी प्रतियोगितामा अहिलेसम्म आठ खेलमा गरेर ३ सय ५२ रन बनाएका छन् । त्यस क्रममा उनले एक शतक र ३ अर्धशतक पुरा गरेका छन् । गएको अप्रिलमा काठमाडौंमा भएको नामिबियासँगको दोश्रो खेलमा उनले शतक पुरा गरेका थिए ।
धेरै रन बनाउने खेलाडीको सूचिमा दोश्रो स्थानमा नेपालका शरद भेषावकर छन् । नेदरल्याण्ड्ससँगको दोश्रो खेलमा ६ रन बनाएको उनले अहिलेसम्म यो प्रतियोगिताको ८ खेलमा २ सय ९४ रन बनाएका छन् । शरदले जारी प्रतियोगितामा ३ अर्ध शतक हानेका छन् । तेश्रो स्थानमा युएईका शाहीमान अनवर छन् । उनले ७ खेलमा ३ अधशतकको मद्दतमा २ सय ८५ रन बनाएका छन् । प्रतियोगितामा अब नेपालले केन्या, हङकङ र युएईसँग दुई–दुई गरेर जम्मा ६ खेल खेल्न बाँकी छ । केन्यासँगको खेल सन् २०१७ को फ्रेब्रुअरी–जुलाईमा, हङकङसँगको खेल सन् २०१७ को जुलाई–नोभेम्बरमा र युएईसँगको खेल सन् २०१७ को नोभेम्बर–डिसेम्बरमा हुने छ ।
आठ टिम सहभागी यो प्रतियोगिताको शीर्ष ४ मा रहने टोलीले सन् २०१८ मा बंगलादेशमा हुने विश्वकप क्रिकेटको छनौट खेल्न पाउनेछन् । पुछारका चार टोली भने डिभिजन २ मा झर्ने छन् ।
Loading...
Social Buttons