प्रधानमन्त्री हुने प्रचण्ड, भिडभाड ओली निवास वालकोटमा (फोटोमा हेर्नुस्)

काठमाडौं, १९ साउन– शक्तिमा आउँदै गरेकाको जयजयकार नयाँ होइन तर, बुधवार भएको प्रधानमन्त्री निर्वाचनपछि शक्तिबाट फर्केका नेतामाथि चाहीँ सर्वसाधारणले हाइ हाइ गरेको दृश्य संसद परिसर बाहिर देखियो ।

बुधवार संसदमा भएको मतदानबाट माओवादी केन्द्रका अध्यक्ष पुष्पकमल दाहाल प्रचण्ड प्रधानमन्त्रीमा निर्वाचित भए । नयाँ प्रधानमन्त्री निर्वाचनको नतिजा आएपछि नेताहरु बाहिर निस्किए । प्रधानमन्त्रीको निर्वाचनको नतिजा आउनासाथ यसअघि देखिने भन्दा फरक दृश्य संसद भवन बानेश्वर परिसरमा देखियो । नवनिर्वाचिन प्रधानमन्त्री दाहाल आफू केही नबोल्ने भन्दै मिडियामा प्रतिक्रिया पनि नजनाइ गए भने निवर्तमान प्रधानमन्त्री केपी शर्मा ओलीको पक्षमा संसद परिसरमा सर्वसाधारणले नारावाजी गरे ।

प्रधानमन्त्री निर्वाचन कार्यक्रम सकेर नेताहरु फर्कंदा बानेश्वर परिसरमा सामाजिक सञ्जाल प्रयोगकर्ताको ठूलो समुह जम्मा भएको थियो । निवर्तमान प्रधानमन्त्री ओलीको तस्बिर सहितको ठूलो फ्लेक्सबोर्डमा आइएम विथ केपी ओली लेखिएको थियो । जव ओली बाहिर निस्किए तव उनीहरु ओली चढेको गाडीतिर झुम्मिन थाले । त्यसैबीच उनीहरुले नारावाजी गरे– ‘राजनेता हाई हाई ।’

ओलीको गाडी केहीबेर रोकियो र विस्तारै भीड छिचोलेर भक्तपुरको बालकोटस्थित निजि निवासतिर लाग्यो । तर त्यहाँ जम्मा भएका सर्वसाधारण र्याली लिएर पैदलै ओली निवास वालकोट गयो । ओली वालकोटमा पुग्दा पनि उनको निवास आसपास ठूलो जनसमुह भेला भएर बसेका थिए । ओली निवास आसपास जम्मा भएकाहरुले पनि त्यसै गरी नारा लगाएका थिए ।

प्रधानमन्त्री निर्वाचित भएका दाहाल भने संसद भवनमै भारतीय दूतावासको फोन मार्फत वधाइ सन्देश ग्रहण गरिरहेका थिए । मतदानको नतिजा आउनुअघि नै राप्रपा नेता तथा पूर्वप्रधानमन्त्री सूर्यबहादुर थापाका सुपुत्र सुनिलबहादुर थापाको मोवाइल मार्फत दाहालले भारतीय विदेश मन्त्रालयबाट बधाइ पाइसकेका थिए । प्रधानमन्त्रीमा निर्वाचित भएपछि चीनियाँ राजदूत उ चुनथाइले लामिम्पाटस्थित निवासमै गएर बधाइ दिएका थिए भने भारतीय प्रधानमन्त्री नरेन्द्र मोदीले त्यसअघि नै ट्वीट गरेर बधाइ दिएका थिए ।

Dropdown Menu