बार्सिलोनाले जित्यो २८ औँ पटक कोपा डेल रे (फोटोफिचरसहित) !!

जेठ १० – बार्सिलोनाले कोपा डेल रे फुटबलको उपाधि जितेको छ । सेभिल्लालाई २-० गोल अन्तरले हराउँदै बार्सिलोनाले उपाधि जितेको हो । यो बार्सिलोनाको कोपा डेल रे को २८ औँ उपाधि हो ।

यसअघि ला लिगाको उपाधि जितेको बार्सिलोनाले कोपा डेल रे को उपाधि पनि जित्दै लगातार दोस्रो पटक दोहोरो उपाधि जितेको छ । जोर्डी अल्बा र नेमारको गोलले बार्सिलोना दोहोरो उपाधि जित्न सफल भयो ।

बार्सिलोनाका हाभिएर मर्चेरानोले खेलको ३६ औँ मिनेटमा रातो कार्ड पाएका थिए । केविन गेमिरोलाई जर्सी तानेर लडाएपछि उनले रातो कार्ड पाएका हुन् ।

सेभिल्लाका बानेगाले पनि अन्तिम समयतिर नेमारलाई लडाउँदा रातो कार्ड पाएका थिए । गोलरहित बराबरीमा ९० मिनेटको खेल सकिएपछि दुबै टिममा १० जनामा सिमित खेल अतिरिक्त समयमा गएको थियो ।

अतिरिक्त समयको छैठौँ मिनेटमा गोल गर्दै अल्बाले बार्सालाई अग्रता दिलाएका थिए । नेमारको अर्को उत्कृष्ट गोलले बार्सिलोना २-० ले विजयी भयो ।

Dropdown Menu