सल्यानमा दुई बालिकासहित चार महिलाको सामुहिक हत्या

काठमाडौं, १५ बैशाख । एउटै घरमा बसेका सल्यान छायाक्षेत्रका चार महिलाको सामुहिक हत्या गरिएको छ । छायाक्षेत्र– ९ रानागाउँमा दुई बालिकासहित चार महिलाको हत्या गरिएको जिल्ला प्रहरी कार्यालय सल्यानले जनाएको छ ।

हत्या हुनेमा २२ बर्षीया सीता खान, सीताका छोरीहरु साढे दुई वर्षकी पवित्रा तथा डेढ वर्षकी सविताको हत्या भएको सल्यानका प्रहरी प्रमुख डिएसपी श्यामबहादुर खत्री बताए । यस्तै मार्के घर भएकी सीताकी बहिनी १८ वर्षकी पवित्रा गिरीको पनि सोही घरमा राति हत्या गरिएको छ ।

हत्याको कारण खुल्न नसकेपछि बलात्कार गर्न खोज्ने अपराधीहरुले घटना घटाएको अनुमान प्रहरीले गरेको छ । घटनास्थलबाट प्रहरीले एउटा मोबाइल फेला पारेको छ । मृतक सीताका श्रीमान रमेश खान देश बाहिर छन् ।

हत्या भएलगतै नेकपा एमालेका पोलिटब्यूरो सदस्य तथा सल्यानका सांसद प्रकाश ज्वालाले हत्याकाण्डको भत्र्सना गर्दै दोषीलाई तत्काल पत्ता लगाउन र कानुनी कारवाही गर्न प्रशासनलाई आग्रह गरेका छन । ‘यो जघन्य अपराधको जति निन्दा गरेपनि पुग्दैन’ बिज्ञप्तिमा एमाले नेता तथा सासंद ज्वालाले भनेका छन् ‘अपराधिक गिरोहलाई पत्ता लगाई कडा भन्दा कडा कारवाहीका गर्न म स्थानीय प्रशासनलाई बिशेष आग्रह गर्दछु ।’

उनले हत्याकाण्ड बारे अनुसन्धानमा जुट्न एमाले सल्यानलाई पनि निर्देशन दिएका छन् ।

Dropdown Menu