सिंहदरबार घेर्ने र काठमाडौंमा प्रदर्शन गर्ने हैसियत कुनै मधेशीको छैन्: यादव

काठमाडौं, ७ जेठ । विभिन्न जनजाति संगठनहरूलाई मिलाएर संघीय गठबन्धन बनाएका संघीय समाजवादी फोरम नेपालका अध्यक्ष उपेन्द्र यादवले मधेशी जनतासंग कुनै हैसियत नरहेको बताएका छन् । संघीय गठबन्धनको आन्दोलनमा मधेशी मोर्चाले खुल्लम खुल्ला असहयोग गरेपछि फोरम अध्यक्ष यादवले मधेशी मोर्चाको हैसियत माथि नै सवाल खडा गरेका छन् । संघीय गठबन्धनमा मधेशी मोर्चालाई सम्मानजनक स्थान दिलाउन र जारी आन्दोलनमा मधेशी जनताको सहभागिता र सक्रियता बढाउन मांग गर्दै आएका सदभावना अध्यक्ष महतोलाई खुल्ला पत्र लेख्दै उपेन्द्र यादवले भनेका छन्- ‘सिंहदरबार र बालुवाटार घेराऊ मधेशी मात्रको क्षमताको विषय थिएन । काठमाडौंमा यसरी आजसम्म कुनै मधेशी नेताले सम्बोधन गरेको इतिहास छैन् । बानेश्वरमा सडक तताउन सक्ने मोर्चामा दम छैन ।’ मोर्चा एक्लैले काठमाडौंमा प्रदर्शन गरोस्, कति मान्छे मारिन्छन् गनेर राख्नुहोला ।

आफ्ना सहयोगीमार्फत सार्वजनिक गरिएको यस पत्रमा उपेन्द्रले आफूलाई मधेशको मात्र हैन् देशकै सबैभन्दा ठूलो नेताको रूपमा चित्रण गरेका छन् । पत्रमा आफ्नो प्रशंसा गर्दै उनले लेखेका छन्- आफ्नो विचार, सिद्धान्त, दायरा, उचाइँ र नजरमा मधेशी मोर्चाका नेताहरूको कुनै हैसियत नभएको र मोर्चाको कुनै नेतासंग उपेन्द्र यादवको प्रतिस्पर्धा नहुने स्पष्ट पारेका छन् । उपेन्द्र यादवको तुलना कुनै मधेशी मोर्चाको नेतासंग नहुने र मोर्चाका सबै नेता महन्थ ठाकुरदेखि लिएर राजेन्द्र महतोसम्म उनको सहकर्मी र सहयात्री मातिर रहेको पत्रमा उल्लेख गरिएको छ ।

अहिलेको आन्दोलन गर्नको लागि उपेन्द्र यादव एक्लै सक्षम छन् र उनले त्यो सञ्जाल र मैदान बनाइसकेका छन् भन्ने कुरा पत्रमार्फत मधेशी मोर्चाको नेताहरूलाई चुनौती दिएका छन् । संघीय गठबन्धन छोड्ने मधेशी मोर्चाका केही नेताहरूको बयानपछि उपेन्द्र यादवले भनेका छन्- ‘तपाईहरुको साथ बिना पनि संघर्षको यो लडाइँमा जीत हुनेछ । हामीसँग सिङ्गो फोरम नेपाल छ, संघीय गठबन्धन छ, समग्र उत्पीडित पहाडी समुदाय छ ।’ उनले अबको लडाईंमा मधेशी मोर्चा, मधेशी दल र मधेशी जनताको कुनै आवश्यकता नरहेको कुरा पत्रबाटै प्रष्टै भनिदिएका छन् ।

Dropdown Menu