नेपालमा मारिने डरले विदेश भासिए गुण्डा नाइके लामा !!!

काठमाण्डु, १ माघ– राजनीतिक रुपमा समेत बलियो पहुँच भएका गुण्डा नाइके गणेश लामा हाल फरार छन् ।

विभिन्न अपराधिक क्रियाकलापमा संलग्न भएर प्रहरीको मोस्ट वान्टेड सूचीमा समेत परिसकेका लामाले पछिल्लो समय जग्गा लेनदेन विवादमा ललितपुर भैंसेपाटीका कैलाश बास्कोटालाई आफ्नै घरमा बन्धक बनाएर ४० लाख रुपैयाँ कागज गरेका थिए ।

अर्का गुण्डा नाइके कुमार घैंटे गत असोजमा प्रहरी इन्काउन्टरमा मारिएपछि लामा फरार भएको प्रहरी बताउँछ । महानगरीय अपराध महाशाखाका प्रमुख प्रहरी वरिष्ठ उपरीक्षक (एसएसपी) सर्वेन्द्र खनालले प्रहरीले सबै गुण्डा नाइकेको निगरानी गरिरहेको र आपराधिक क्रियाकलापमा संलग्न हुने जो कोहीलाई पनि कानूनी दायरामा ल्याउने बताए ।

‘ललितपुर घटनापछि गणेश लामा फरार छन् । उनी हाल नेपालबाहिर रहेको सुनिएको छ । प्रहरीले आफ्नो ठाउँबाट गर्नुपर्ने काम गरिरहेको छ, खनालले काठमाण्डु टुडेसँग उनले भने, ‘अपराध गर्ने जो कोहीलाई पनि कानूनी कठघरामा उभ्याउने हाम्रो जिम्मेवारी हो ।’

स्रोतले काठमाण्डु टुडेलाई दिएको जानकारी अनुसार उनी अहिले कहिले दुवै त कहिले श्रीलंकाको राजधानी कोलम्बो गर्दै प्रहरीबाट लुकिरहेका छन् ।

को हुन् गणेश लामा ?
पछिल्लो समय गुण्डागर्दीको आडमा ठेक्कापट्टा कब्जा गर्ने काममा गणेश लामा प्रभावशाली देखिएका थिए । काभ्रेका स्थायी बासिन्दा लामा विजयकुमार गच्छदार नेतृत्वको फोरम लोकतान्त्रिकका केन्द्रीय सदस्य ह्न् ।

सुरुसुरुमा दीपक मनांगेको सहयोगीका रुपमा विभिन्न आपराधिक क्रियाकलापमा लागेका लामाले पछि छुट्टै समूह बनाई गुण्डागर्दी सुरु गरे । उनले ठमेल र दरबारमार्गमा डान्सबारदेखि सिन्धुपाल्चोकको तातोपानी नाकासम्म सञ्जाल बिस्तार गरेका थिए ।

गैरकानूनी रुपमा अकुत सम्पत्ति जम्मा गरेको आरोपमा सम्पत्ति शुद्धीकरण विभागले उनीविरुद्ध मुद्धासमेत हाल्यो । तर, लामा केही समय जेल बसेपछि दोसो संविधानसभामा उम्मेदवारी दिएको भोलिपल्ट नै विशेष अदालतमा ३ करोड धरौटी बुझाएर छुटे ।

कम्पनी खोलेर ठेक्कापट्टा गर्दै आएका छन् । गुण्डागर्दीबाट आर्जन गरेको पैसाले उनको ललितपुरको ग्वार्को, जडिबुटी र ललितपुरमा गरी करिब ३० आना जग्गा, सिन्धुपाल्चोकको सिमाघाट मेलम्ची र सिरुवा कन्सट्रक्सनमा ७५ प्रतिशत लगानी गरेका छन् ।

Dropdown Menu