शुभ विहानीसँगै तपाईको आज !!!आज २०७२ माघ १४ गते बिहीवार

आजको पञ्चाँग

आज वि.सं. २०७२ माघ महिनाको १४ गते बिहीवार । श्री सूर्य उत्तरायण शिशिर ऋतु । माघकृष्ण पक्षको चतुर्थी तिथि अहिले बिहान ११ बजेर ०४ मिनटसम्म उपरान्त पञ्चमी तिथी । उत्तराफाल्गुणी नक्षत्र । तदनुसार नेपालसंवत ११३६ पोहेलागा । ई.सं. २०१६ जनवरी महिनाको २८ तारिख ।

आजको राशिफल

मेष राशिः

मेष राशि हुनेहरुको लागि आजको दिन अनुकूल मान्न सकिन्छ । आरोग्यता मिल्ने र कान्तिमा बृद्धि हुनेछ भने शत्रुका विरुद्ध वचस्व कायम गर्न सकिने छ । अवसर तथा समयको सदुपयोग गर्ने चेष्टा बढाएमा प्रतिस्पर्धामा विजयी भइने र सफलता हात लाग्नेछ । लक्ष्मीकृपा बढ्ने योग परेकोले व्यवसायिक कार्यक्षेत्रबाट पनि राम्रो आर्थिक उपलब्धि गर्न सक्नुहुने छ । आज यहाँलाई हरियो रंग, छ अंक अनुकूल रहने छ भने विपक्षिको सम्मान गर्न जानेमा यहाँको ईज्जत बढ्ने छ ।

वृष राशिः

वृष राशिका व्यक्तिहरुको लागि आजको दिन केही ख्याल पुर्याउन पर्ने समय छ । आत्मप्रशंसाको आसक्ति एवम् विद्वतताको अनाबश्यक फुतिफार्तिले आफैलाई हलुङ्गो बनाउनसक्ने र फगतको विषयान्तर चर्चाले आफ्नै कामकार्यमा बाधापुग्ने साथै अन्तिममा पछुतो हुनसक्ने छ । तथापि दैनिक व्यवसाय आदिबाट आंशिक लाभ गर्न सकिने नै छ भने केही बढी परिश्रम तथा संघर्ष पछि पूरा गर्न खोजेको कार्य केही अघि बढाउन सकिनेछ । आज माँ सरस्वतीको श्रद्धाभक्तिले विद्यार्थीलाई र वगलामुखी वा कूलदेवताको सेवाले सबैलाई हित गर्नेछ ।

मिथुन राशिः

मिथुन राशिका व्यक्तिहरुको लागि आज बोली व्यवहारमा केही सावधानी अप्नाउनु पर्नेछ । कसैसँग मनोमालिन्य हुनसक्ने तथा मनमा संकोच बढ्नसक्ने सम्भावना छ । कामकार्यमा पनि अबरोध एवम् प्रतिकूलताको ग्रह लक्षण रहेकोले अल्लि बढी यत्न गर्नुपर्ने तथा बुद्धि पुर्याउन पर्ने जरुरी हुनेछ । स्वास्थ्यमा पनि केही मन्दि आउनसक्ने छ । पारिवारिक समस्या थपिने र गर्नलागेको काममा विलम्ब हुने सम्भावना छ । आज चार अंक, सेतो रङ्ग यहाँको लागि उपयुक्त हुनेछ । आज यहाँलाई आमा वा मातृशक्तिको आर्शिवादले मद्दत गर्नेछ ।

कर्कट राशिः

कर्कट राशिका व्यक्तिहरुको लागि आज पराक्रम बढ्ने हुनाले पुरुषार्थकर दिन रहनेछ । शारीरिक जोशजाँगर बढेर रोकिएर रहेका काम पूरा गर्न मन लाग्ने छ । सहयोगीहरु पनि जुट्ने छन् । इष्टमित्र तथा जानपहिचानका व्यक्तिहरुबाट प्रशंसा पाइनेछ । दाजुभाईबीचको सम्बन्धमा सुधार आउने एवम् भाइबहिनीसँगको सहकार्यबाट पनि फाइदा हुनेछ । व्यवसायिक कामबाट आर्थिक उपार्जन गर्न सकिनेछ । तीन अंक, हरियो रङ्ग आज तपाईको लागि उपयुक्त रहनेछ भने दिदी बहिनीलाई उपहार दिनाले अपेक्षित उपलब्धि ल्याउन सहयोग गर्नेछ ।

सिंह राशिः

सिंह राशि हुनेहरुको लागि आजको दिन सामान्य अनुकूल देखिएको छ । वाणीमा दोषलाग्न सक्छ, बोलीवचनको व्यवहारमा ख्याल पुर्याउनु होला । व्यवसायिक कार्यमा भने प्रगति नै हुने देखिएको छ तथापि सन्चित धनको अपव्ययलाई भने नकार्न सकिन्न । समाजिक कार्यमा संलग्न हुने मौका मिल्नसक्ने छ । नाता–कुटुम्बिक सम्बन्धमा पनि केही सजग हुन जरुरी छ । आज यहाँको लागि दुई अंक, सेतो रंग शुभ रहने छ भने माँ वगलामुखीको दर्शनभक्तिले सम्भावित दोषलाई कम गर्न मद्दत हुनेछ ।

कन्या राशिः

कन्या राशि हुनेहरुको लागि आजको दिन ईज्जत तथा मानप्रतिष्ठा बढ्ने खालको छ । भौतिक उन्नति हुने तथा सुखसन्तोष मिल्ने योग परेको छ । तथापि अपेक्षित मुख्य कार्यमा केही अड्चन आउनसक्ने देखिएको भने छ । बाँकी जनव्यवहारमा ग्रहगोचरको प्रभाव सामान्य नैै देखिएको छ । व्यवसायिक लाभ प्राप्त हुने र स्वजनहरुबाट प्रोत्साहन मिल्नसक्ने छ । आज यहाँलाई एक अंक, रातो रङ्ग शुभ रहनेछ भने बाधा अड्चन निवारणको लागि विद्यार्थीहरुले माँ सरस्वतीको तथा अन्य सबैले माँ वगलामुखीको सेवाश्रद्धा गर्नु उपयुक्त हुनेछ ।

तुला राशिः

तुला राशि हुनेहरुको लागि आज खर्च बढ्नसक्ने देखिएको छ भने कार्यक्षेत्रमा पनि अल्लि बढी मेहनत गर्नुपर्ने छ । शुरुमा केही अपजश पनि खेप्न नपर्ला भन्न सकिन्न । अल्लि बढी कोसिस एवम् संघर्षले केही उपलब्धि ल्याउन सकिएला । औपचारिकता निर्वाह गर्नपर्ने खालका भेट्घाट आदिको लागि याात्रा गर्नु, उपहार आदि दिनु जस्ता कार्यमा खर्चको सदुपयोग गर्नु उचित हुनेछ । त्यस्तै ३ अंक र पहेंलो रङ्ग यहाँलाई आज शुभ हुनेछ भने कसैको सहयोगार्थ भूमिका निर्वाह गर्नाले सन्तोष मिल्नेछ ।

वृश्चिक राशिः

वृश्चिक राशि हुने व्यक्तिहरुको लागि आज पुरुषार्थ बृद्धि हुने छ । मान्छेहरुबाट प्रसंशा मिल्नेछ भने सहयोग प्राप्ति हुनाले चित्त शान्ति हुनेछ । व्यवसायिक व्यस्तता बढ्ने र आर्थिक लाभ गर्न सकिने छ । तथापि परिश्रमविनाको धर्नाजर्न तर्फपनि मन आकर्षित हुनसक्ने छ, जसले नैतिकतामा प्रश्न चिह्न लगाउनसक्ने छ ख्याल गर्नुहोला । विद्यार्थीहरु अध्ययनमा सफल भइने र हौसला मिल्ने छ । यात्रा हुनसक्ने सम्भावना पनि छ । नयाँ व्यक्तिसँग सुमधुरसम्बन्ध स्थापित हुनेछ । आज यहाँलाई दुई अंक, सेतो रङ्ग तथा दीनदुखीको सेवा फापकर हुनेछ ।

धनु राशिः

धनुराशि हुनेहरुको लागि आजको दिन सकारात्मक रहेको छ । मानसम्मान बढ्ने तथा प्रतिष्ठाको बिकास हुनेछ । व्यापार तथा व्यवसाय, राजनीति एवम् समाजसेवाको क्षेत्रमा पनि ग्रहले ठिकै भूमिका निर्वाह गरेको देखिएकोले यथोचित लाभ एवम् सफलता हातपार्न सकिनेछ । जिम्मेवारी थपिनसक्ने छ । जागिरेहरुको लागि पनि दिन सहज एवम् सन्तोषकर रहनेछ । समयको सदुपयोग गरे राम्रो फाइदा उठाउन सकिने छ । यहाँलाई आज एक अंक, रातो रङ्ग शुभ हुनेछ भने पितृसेवा हितकर हुनेछ ।

मकर राशिः

मकर राशि हुने व्यक्तिहरुको लागि आजको दिन अध्यात्मिक ज्ञान तर्फ मन उत्प्रेरित हुने र धार्मिक कार्य सम्पादन हुनसक्ने छ । समाजसेवाका कार्यमा पनि सहभागि हुने अवसर मिल्नेछ । व्यवसायमा लक्ष्मी कृपा हुने ग्रहगोचरको प्रभाव परेको छ । यात्रायोजना एवम् नयाँ कार्यको थालनीको बारेमा विचार विमर्श हुनेछ । रोकिएर रहेका केही कार्यमा सफलता मिल्नेछ भने जागिरबाट पनि सन्तोष भइनेछ । आज यहाँहरुलाई नौ अंक पहेलो रंग र माँ सरस्वती एवम् वगलामुखीको सेवाभक्ति शुभ हुनेछ ।

कुम्भ राशिः

कुम्भ राशिका व्यक्तिहरुको लागि आज संघर्षकर दिन देखिएको छ । कामकार्यमा अबरोध सृजना हुने तथा स्वास्थ्यमा पनि प्रतिकूलता देखिनसक्ने सम्भावना रहेकोछ, आहारविहारमा विचार पुर्याउन जरुरी हुनेछ । असफल प्रेमको स्मृतिले सताउने र आत्मबलमा ह्रास आउनसक्ने भएकोले मानसिक दृढतालाई बढाउनु उपयुक्त हुुनेछ । यहाँको लागि आज आठ अंक, रातो रङ्ग र बाधाबिघ्न निवारको लागि पितृदेव एवम् इष्टदेवको साधना शुभ हुनेछ ।

मीन राशि

मीन राशिका व्यक्तिहरुको लागि आज भौतिक सुख सुविधा एवम् सेवा सत्कार मिल्ने खालको रहेको छ । जीवन साथी वा विपरित लिङ्गीको सहयोग मिल्ने र प्रेमसम्बन्ध सुमधुर हुनेछ । विवाह योग्य युवायुवतीको लागि उपयुक्त स्थानबाट विवाह प्रस्ताव आउनसक्ने सम्भावना छ । देश तथा विदेशको यात्राको पनि संयोग देखिन्छ । व्यापार व्यवसायबाट लाभ र आफन्तजनको सहयोग मिल्ने छ । आज यहाँहरुको लागि सात अंक, सेतो रङ्ग अनुकूल रहने छ भने उपहार व्यवहार फापसिद्ध हुनसक्ने छ ।

Dropdown Menu