यी हुन् खाने तेलमा कालोबजारी गर्ने उद्योगी नरेश राठी

विराटनगर, २१ कात्तिक– विराटनगरमा उद्योगले नै एउटै ब्याच नम्बरमा दोहोरो मूल्य राखेर खाने तेलको कालोबजारी गर्ने गरेको खुलासा भएको छ । स्थानीय चन्द्रशिव राइस एन्ड आयल मिलले उत्पादन गर्ने घैला छाप तोरीको तेलमा यस्तो कालोबजारी हुने गरेको पाइएको हो ।

प्याकेटको ब्याच नम्बर एउटै राखी मूल्य भने फरकफरक राखेर कालोबजारी गर्ने गरिएको छ । सरकारी टोलीले बजार अनुगमनको क्रममा उद्योगबाट बाहिर पठाउने भन्दै प्रतिलिटर २ सय २० रुपैयाँ मूल्य अंकित गरेको फेला पारेको छ । उद्योगले ब्याच नम्बर ३० अक्टोबर २०१५ को मूल्य एक सय १६ राखेको छ ।

सोही ब्याच नम्बरमा नोभेम्बर २०१५ को मूल्य दुई सय २० रुपैयाँ अंकित गरेको छ । यसरी एउटै ब्याच राखेर दोहोरो मूल्य राख्न पाइँदैन । उद्योगले ब्याच नम्बर एउटै राखेर स्थानीय बजारका लागि भने एक सय १८ रुपैयाँ मूल्य तोकेको छ । राइस मिलका व्यवस्थापक नरेश राठीले भने, ‘हामीले काठमाण्डुका लागि मूल्य बढाएका हौँ । काठमाण्डुका व्यापारीले मूल्य बढाएर पठाउनू भनेकाले बढाइएको हो ।’

उनले विराटनगरमा पनि दुई सय २० रुपैयाँ मूल्यकै तेल बिक्री गरिने बताए । तोरी तेलको मूल्य दुई साताअघिसम्म एक सय ७० रुपैयाँमात्र थियो । –अन्नपूर्ण पोस्टबाट

Dropdown Menu